AMBON,Nunusaku.id,- Kota Ambon memasuki usia ke-450 tahun, Minggu (7/9/25) kemarin. Namun upacara “Kajadian” baru diperingati, Senin (8/9).
Upacara yang dipimpin Upulatu Kota Ambon Bodewin Wattimena kental dengan nuansa khas Ambon dan Maluku itu berlangsung khidmat di lapangan Merdeka, Senin tadi.
Mulai dari dekorasi, peserta upacara hingga pengisi acara seluruhnya menggunakan busana lokal. Demikian pula dialek yang dipakai MC hingga Kapata Upulatu Maluku dan Kota Ambon juga memakai dialek lokal.
Upulatu Maluku, Hendrik Lewerissa bersama nyora, Maya Baby Lewerissa, serta tamu undangan ama-ama deng pai-pai lainnya hadir upacara itu dengan sukacita dan syukur.
Dalam sekapur sirih, Upulatu Maluku, Hendrik Lewerissa mangaku, tema Kajadiang ka-450 Kota Ambon yaitu “Bergerak Bersama Ambon, Maluku, dan Indonesia Membaik”, menurutnya akang paleng bagus.
Tema ini seng sekadar taru asal taru saja, tapi pasang mulia yang mesti tatanam di semua warga kota Ambon pung hati.
“Supaya katong baku sayang, baku bantu, satu pung beban samua pikol sama-sama, satu pung susah samua rasa akang, lalu karja sama-sama par biking Bae supaya samua bisa dapat Bae tarus-tarus,” ujar Upulatu.
Beta mau bilang tema ini, lanjut Upulatu, jang cuma story di mulu saja, tapi musti kasi tunju akang dalam kalakuang hari-hari, dalam karja hidop hari-hari.
Baik kata itu ASN, pegawai swasta, tentara, Polisi, orang tatua, mahasiswa, anak-anak sekolah sampai dengan anak-anak kecil.
Sejarah panjang negeri ini jadi bukti par anak-anak cucu bahwa katong pung datuk-datuk su angka sumpah for baku jaga, baku dukung, baku sayang walaupun beda suku deng beda agama.
“Sampai oras ini masih tatanam di samua pung hati, ikatan pelaga gandong, ale rasa beta rasa, potong di kuku rasa di daging, sagu salempeng pata dua. Ini warisan adat dan luhur yang mesti katong jaga akang tarus-tarus,” ingat Upulatu Hendrik.
Menurutnya, Upulatu dan Pati Kota Ambon pung karja baru saumur jagong, kurang labe baru tujuh bulan terakhir ini. Dong pung waktu masi panjang, karja juga masih batambong, tanggungjawab ada maliong.
“Tagal itu beta minta dong samua para pembesar, pegawai dan warga kota Ambon musti bantu dong dua,” ajaknya.
“Barang dong dua seng bisa biking akang sandiri, dong dua pung kaki tangan pendek ibarat manyapu lidi akang seng bisa kasi barsih kalau cuma satu urat. Saurat saja manyapu lidi seng bisa kasi barsih kintal, kalau akang su taika jadi satu baru bisa,” pesan Upulatu.
Sama dengan kota-kota lain di Indonesia, kota Ambon punya banyak masalah, ada masalah sampah, air bersih, lalu lintas tambah padat, layanan kesehatan, pendidikan, tata ruang kota deng masih banyak lai.
Upulatu deng Ina Pati pung motto “Beta Par Ambon, Ambon Par Samua.” Motto itu akang su batul deng cocok paskali for jaga deng biking Bae for kota Ambon.
Tapi selaku Upulatu Maluku, mau kasi inga dong samua warga kota Ambon, pas di hari jadi ke-450 ini jang dong paripurna topu dada Beta Par Ambon, kalau masih buang sampah takaruang.
Jang bilang Beta Par Ambon kalau hidop suka langgar aturan parkir sambarang tampa, bajual di bukan akang pung tanpa.
Dong yang ASN, jang bilang Beta Par Ambon kalau maso kantor talat, dudu-dudu di rumah kopi lalu laste pulang tempo, apalagi waktu di kantor cuma duduk tukel kiri kanan su bagitu bale barsunggut di balakang-balakang.
Anak-anak sekolah jang bilang Beta Par Ambon kalau masih pamalas blajar, tiap hari maeng game, tukang bolos, seng dengar-dengaran apalagi suka baku undang lalu bakalai di jalan-jalan.
“Beta minta dong musti berubah dong musti robah kalakuang. Mari katong biking par Ambon, mulai dari kalesang diri, kalesang rumah, kalesang kintal, kalesang karja, kalesang balajar, kalesang hidop orang Basudara,” pesan Upulatu.
Upacara hari Kajadiang ka-450 Kota Ambon diakhiri syukurang di Pattimura Park par Ina Ama tamu undangan, deng makan patita di jalan A.Y Patty par warga kota. (NS)
